كلنا مدمنون

“المخدرات”

‘مخدِّر’ ده اسم فاعل من الفعل ‘خدَّر’

‘خدر’ يعني ستر او غطّى

عشان كدة المخدرات بتتسمى مخدرات عشان بتغطي العقل

لما الواحد بيتكلم عن المخدرات اول حاجة بتيجي على باله خمور حشيش أفيون هيروين او اي حاجة من الحاجات دي

هو فعلا الحاجات دي كلها مخدرة بمفهوم انها بتغطي العقل

المشكلة ان كل إنسان فينا ليه قدرة تحمل معينة و لما بيوصل للقدر دي بيبقى عايز يشرب عشان ينسى

الفكرة بقى ان في ناس بتشرب و في ناس بتحشش

و في ناس بتروح للحبوب و ناس بتروح للحقن و ناس تروح للبودرة

كل دول قشطة بيبقوا عارفين و معروفين انهم مدمنين و بيعملوا دماغ عشان يطلعوا من اللي هم فيه

بس الواقع ان في ناس كتير كمان لما بتنضغط صحيح مش بتعمل اي حاجة من دي بس مثلا بتروح تسمع موسيقى او تاكل شيكولاتة او القهوة و يعيش جو توفيق الحكيم و خالد مش عارف مين ده (الله يرحمه) او تاكل اي حاجة في وشها حتى لو بني ادمين

ولو حبينا نسخن البوست شوية

في ناس ممكن تتجه للجنس

و ممكن كمان ناس تتجه للدين و الوعظ من باب ان الفقراء يدخلون الجنة الأول و ان الدنيا جنة الكافر و سجن المؤمن

من وجهة نظري اللي مالهاش اي تلاتين لازمة ان اللي بيشم و اللي بيسمع وعظ و خطب الاتنين واحد لان الاتنين هدفهم واحد اللي هو يخدر عقله و يثبطه و يوقفه عن التفكير عشان هو مش قادر يتعامل مع الموقف الحالي

عشان كدة كلنا مدمنون بس كل واحد مدمن حاجة مختلفة

طب المفروض نعمل ايه بقى ؟!!!

المفروض اننا ما نوقفش دماغنا و لا نغطي عقلنا، المفروض ان لما يمر عليا موقف افكر ازاي اطلع منه و أواجهه،

المفروض اني لو اتكسرت و افلست افكر ازاي ابدا من جديد، المفروض ان لو الدنيا بتغلى و دخلي بيقل افكر ازاي احسن دخلي و اقلل مصاريفي

المفروض اني لو طلقت و مراتي او جوزي سابتني و راحت اتجوزت أقف و اكمل حياتي و الاقي اللي ممكن احبه و يحبني

المفروض ان لو ابني مرض و لا حتى مات أقف و اكمل و اعالجه او اجيب عيل غيره

الهدف من الكلام مش ان الواحد يبقى عديم الاحساس و زي الإنسان الآلي ابدا لازم نزعل و نتضايق بس ما نقفش عند الموقف لان الحياة مش هتقف

الهدف من الكلام مش انك غلط تسمع وعظ و خطب بس نسمع وعظ و خطب عشان ايماننا يزيد و نعرف ان ربنا موجود و ان تقدير ربنا فيه الخير و ان مادام في باب اتقفل مليون هيفتح بس مستني اني اقوم أمد ايدي و افتح الباب

الهدف من الكلام مش ان الواحد ما ياكلش شيكولاته او يعمل اي حاجة لما يتضايق الفكرة انه يعملها بهدف انه يشحن عشان يقوم يكمل و يجرب تاني و يعافر

الهدف انك لما تضرب مخدرات و توقف دماغك و تفصل عن الكون و تعمل واقع افتراضي هتفوق في لحظة ما لما المخدرات تخلص و هتلاقي الواقع زي ما هو و يمكن اوسخ عشان انت كنت راكن