حاول تتخيل الموقف بقلبك و واقعية
يا جماعة غسيل الأسنان بالنسبة للكائن المصري موضوع صعب جدا و زي كدة ترتيب السرير لما تصحى
ايه فايدة اني ارتب السرير و اطبق الغطا و ارجع افرده تاني لما انام و بعدين ما انا لما اطبقه السرير بيبرد خصوصا في الشتا
نرجع لغسيل السنان
دلوقتي ازاي اغسل سناني و انام ؟!!
فين مبدأ النقنقة و تعدي على التلاجة تقلب في اي حاجة و تاخد بوق كولا
مثال حي دلوقتي غسلت سناني الساعة ١١ بالليل
راجع من الحمام عديت على السفرة لاقيت صنية المكرونة بالباشاميل ادخلها التلاجة لا اراديا و الله فتحتها و اخدت حتة
و بعدين افتكرت اني غاسل سناني قلت اروح الحمام اتمضمض
و حصل فعلا و الله
و انا راجع لاقيت نفسي بتكرع مكرونة قمت فاتح التلاجة و واخد بوق كولا عشان تهضم
و طبعا رجعت على الحمام اتمضمض
و رجعت على السرير جري قبل ما اعدي على التلاجة 
الحمد لله نمت
بس عطشان
طبيعي جدا ابلع
ما لاقيتش مية جنبي قمت اجيب مية و شربت و بعدين قمت فاتح شيكولاتة واكلها
و انا في وسطها افتكرت اني غاسل سناني
بس المرة دي بقى اتعلمت من المواقف السابقة و حلفت ما انا متمضمض تاني قلت هو رزق السوس بقى و برده خلي دكاترة السنان تستنفع
و الله الموضوع متعب مش كدة