المجاهرة

الحديث بتاع المجاهرة ده عجيب قوي سبحان الله

حديث أبي هريرة قال: سمعت رسول الله ﷺ يقول: كل أمتي معافى إلا المجاهرين، وإن من المجاهرة أن يعمل الرجل بالليل عملا، ثم يصبح وقد ستره الله عليه فيقول: يا فلان، عملت البارحة كذا وكذا، وقد بات يستره ربه، ويصبح يكشف ستر الله عنه

١- اللي بيعمل الموضوع ده عارف انه بيعمل غلط لإنه بيعمله بالليل في الخفاء

٢- اللي بيعمل الغلط بيتكلم فيه مع صاحبه يعني مش بينشره

الناس ساعات بتعمل الغلط (وهي عارفة انه غلط) و بعدين تجاهر بيه او تعلنه مش تحدي لله و لا تحدي لأوامر الله خالص

١- الرسول ص بدأ الحديث ان دول ناس من امته يعني مسلمين مش كافرين و لا ملحدين بيتحدوا الله و أوامره

٢- لما بيكلم بيكلم فلان اللي هو شخص مش على الملأ من باب التحدي

طب هم ليه بيجاهروا لما هو مش تحدي و لا نكران لأوامر الله؟

اللي انا بأشوفه دلوقتي بالفعل إنه بيكون في الأساس من أجل البشر، بيجاهر من اجل البشر ؟ ازاي؟

١- إما انه بيكون فخور بين أصحابه إنه عمل الحاجة دي

٢- او إنه عايز يكسر عرف المجتمع اللي حاسس فيه انه مخنوق و نظام لن أعيش في جلباب أبي

٣- إما انه بيكسر قوانين و قواعد مجتمع او دولة هو عايش فيها و مش حابب العيشة و لا القوانين و عايز يقولهم عبوكوا كلوكوا

بس رغم ان الموضوع ماهو الا نفسنة بشر بينهم و بين بعض و رغم ان في ناس كتير بتذنب الا ان الرسول خصهم بحديث و ربنا بلغه عنهم انهم مش معافين موضوع عجيب والله

المشكلة يا جماعة إن الله يسمع و يرى و الله لما يسمع و يرى يغار و غيرة الله ان تؤتى محارمه و إذا انا كبشر أعمل الحرام عشان اكسر قواعد البشر او عشان اغيظ الناس او عشان مش مبسوط من قانون

يبقى انا استهنت بأمر الله مقابل تحقيق مراد شخصي

الموضوع ممكن يكون بالنسبة لنا بسيط لكن عند الله عظيم

انا إنسان أكسر أمر من أوامر الخالق و كمان أقول إني كسرته ؟!! عادي كدة ؟